Col 1 | MED | STEP | Na Pol, Kraist Jisas nga nombuⱡa rung wu ei. Got elim nga numan ila, na tᵾpa nombuⱡa rung wu mundrum. Na kᵾn ana, Timoti raⱡ moⱡpᵾⱡ, mon ei ropᵾⱡ, enim Got nga wamp Kolosi kona ila Kraist mondᵾk pᵾtmin wamp kᵾⱡ kᵾn, mon rop ngᵾnmbᵾⱡ. Tᵾn nga pora, Got Tipam ei ndi, enim numan kai mbᵾ ngumba, moⱡpa kundi uⱡ ei nga, enim kᵾn piyangga!

Colossians 1

Pol Ndi, Mon Ropa Kolosi Wamp Kᵾⱡ Ngurum

1 Na Pol, Kraist Jisas nga nombuⱡa rung wu ei. Got elim nga numan ila, na tᵾpa nombuⱡa rung wu mundrum. Na kᵾn ana, Timoti raⱡ moⱡpᵾⱡ, mon ei ropᵾⱡ, enim Got nga wamp Kolosi kona ila Kraist mondᵾk pᵾtmin wamp kᵾⱡ kᵾn, mon rop ngᵾnmbᵾⱡ. Tᵾn nga pora, Got Tipam ei ndi, enim numan kai mbᵾ ngumba, moⱡpa kundi uⱡ ei nga, enim kᵾn piyangga!

Got Ndi, Kolosi Wamp Kᵾⱡ Nga Mondpa Pili Orunga Etpa Ronduⱡ Mundrum

3 Tᵾl ndi, enim nga orunga atinga rondᵾrmbᵾⱡ ei kᵾn, tᵾl ndi, Nuim Jisas nga Tipam Got ei kᵾn, angge rᵾk rᵾk nᵾtmbᵾⱡ. 4 Ei nambuⱡ emel, tᵾl pᵾtmbᵾⱡ ei, enim nga mondpa pili orunga, Kraist Jisas kᵾn tek, Got nga wamp mbᵾ kᵾn, wamp numan ngui uⱡ ei etmin. 5 Ik kupa, Rᵾnang Ik Kai kᵾⱡ, enim kᵾn kuimp tepa urum ei kᵾn, enim muⱡ kona ting mel mbᵾ pᵾtᵾng ei mel nokundᵾk mormin. Ei nga, enim nga mondpa pili uⱡ ei kᵾn, wamp numan ngui uⱡ etᵾk tek mormin ei, wi muⱡ kona Got Tipam ei ndi, enim nga mel ting mbᵾ tendpa kai etpa morum mbᵾ ting. Ei nga, uⱡ nᵾnmᵾn mbᵾ etᵾk mormin. 6 Rᵾnang Ik Kai nga memp kai mbᵾ omba pol ila oⱡnga, akup muⱡ uⱡ mbila pora, tepa ndaip nᵾnᵾm. Ei kᵾn, enim unt ui ti puⱡ mondᵾk, Got nga wamp pol tᵾtᵾm uⱡ ei, pilik tᵾk, akup minal pep rok enmin ei mel ku. 7 Tᵾl nga kongun peng rᵾp wu Epapras kᵾn, enim Got nga wamp ruk tᵾtᵾm uⱡ ei, pilik kandᵾk tᵾtᵾng. Wu ei, Kraist nga kongun wu ronduⱡ ei, tᵾl kongun etmbᵾⱡ ei mel ku etᵾm. 8 Enim Muⱡnga ei ndi, nimba nguⱡnga, wamp numan ngui uⱡ etmin mbᵾ, wu ei ndi, tᵾl kundpa nitim.

9 Wote, uⱡ puⱡ ila, enim nga ik timan mbᵾ, kuimp tep pᵾtmbᵾⱡ ui ei kᵾn, enim nga atinga rondᵾp mint ormbᵾl. Tᵾl ndi, Got waldpᵾⱡ, elim nga Muⱡnga ei ndi, enim Got nga pitim uⱡ mbᵾ nga pilpa kungndi kai mat ngangga, pilpa kungᵾndi orunga, etpa piral ndupa tangga! Wote, pilpa mbi ndui uⱡ ei, pilik teing nᵾmbᵾⱡ atinga rundurmbᵾⱡ. 10 I tambuⱡa kᵾn, enim Nuim ei nga numan pᵾtᵾm uⱡ mbᵾ mel etᵾk, wamp kupa mbᵾ molk, rᵾk rᵾk Nuim ei nga numan ngurum uⱡ mbᵾ itᵾi! Ei nga, enim nga kongun etᵾk, pek nok andurmᵾn puⱡ orunga, Got nga uⱡ kai mbᵾ pilik kelik etᵾk, wote Got nga pitim uⱡ mbᵾ, enim kᵾn tepa mba ou itangga! 11 Tᵾlndi enim nga atinga rondpᵾⱡ kᵾn, Got elim nga uⱡ eng nui kai ronduⱡ tetᵾm mbᵾ ndi, enim etpa ronduⱡ mundangga, wote enim mbun mindil uⱡ pem mbila, ronduⱡ puk molk, numan kun koma ti uⱡ mbila mint etᵾk muⱡᵾi! Wote ambulk palk, Got Tipam ei kᵾn angge nᵾi! Ei nambuⱡ emel, Got ei ndi, elim nga tᵾpa mumuk rui kona rᵾⱡang pi ei, enim tᵾpa ngumba pilpa tᵾpa kun, inditim kona ei ting. 13 Got Tipam ei ndi, tᵾn wamp mbᵾ pora, rumbᵾⱡ mul uⱡ mbᵾ nga ronduⱡ ila moⱡmina, tᵾn etpa tᵾpa, wote rᵾp etpa mepa mba, elim nga Kangᵾm nga tᵾpa mumuk rui uⱡ ila mepa purum. 14 Wote, Got elim nga kangᵾm ei ndi, tᵾn nga uⱡ kit etmin mbᵾ tinga nduⱡnga, tᵾn akup wei mormun.

Kraist Elim Wamp Mel Raⱡpa Kongun Itim

15 Got ei mo ropa morum, kᵾnmin ei mel, Kraist kᵾndᵾrmᵾn. Kraist ei, Got nga kangᵾm kumina ei. Got ndi, mel mbᵾ pora, mim itim mbᵾ nga Kraist ei, ama oⱡa orunga morum. 16 Kraist ei moⱡnga kᵾn, Got ndi, muⱡ kona ila kep, ya mᵾi kona ila kep, kᵾni nᵾkᵾni mel, mel tetᵾm mbᵾ pora itim. Wu king, gapman muna, wu Nuim na, wote mel namba mel tetᵾm mbᵾ pora, Got ndi, Kraist iti nilinga itim. Ei nga mel mbᵾ pora, Kraist moⱡnga mint itim ei nga mel mbᵾ pora, Kraist nga tetᵾm. 17 Kraist ei, kuimp tepa moⱡnga kᵾn, mel mbᵾ pora akil tepa itim. Ei nga, Kraist nga ronduⱡ ila mel mbᵾ pora, tᵾpa tenda etpa ambuⱡpa morum. 18 Rapa tenda ila wamp mbᵾ nga peng ei, elim morum. Wote, elim nga kᵾng kᵾⱡ rapa tenda ila wamp kᵾⱡ. Elim nga kangᵾm kumina ei, koⱡpa kont mul uⱡ ei nga, elim puⱡ mondpa etpa, akup elim mel mbᵾ tᵾpa mana ndupa, elim kuimbal morum. 19 Got elim nga numan ila, elim namba uⱡ etᵾm mbᵾ pora, kangᵾm kᵾn ngumba rukᵾr ndurum. 20 Got elim nga kangᵾm ei moⱡnga kᵾn, mᵾi kona mel mbᵾ pora, aldpa elim ndi rukᵾr titim. Elim nga kangᵾm, nde peta ila kurum uⱡ ei ndi, moⱡpa kundi uⱡ kai ei, muⱡ kona ila kep, wote ya mᵾi kona ila kep, mel mbᵾ pora, elim rukᵾr titim.

21 Unt, enim Got kᵾn ruⱡ etᵾk, el rui wamp mel molk, numan kit pendᵾk, uⱡ kit mbᵾ etᵾng. 22 Wote akup, elim nga kangᵾm nde peta ila kurum uⱡ ei ndi, enim etpa elim nga wamp mbᵾ randpa, elim nga kuimp keta ila wamp kun kai wingti kᵾⱡ, muⱡeing nimba itim. 23 Ei nga, enim nga mondpa pili orunga, ronduⱡ pangga muⱡᵾi! Enim Rᵾnang Ik Kai ei, kuimp tek pilik tᵾtᵾng ni kᵾⱡ, mel ti ndi kundpa, ekit ti nᵾtangga! Na Pol, Rᵾnang Ik Kai ei nga kongun kindmant wu ei moⱡᵾp, ik ei nilmba, mᵾi kᵾmp kona mbila pora, pilik tᵾnmin.

Pol Ndi, Kolosi Wamp Kᵾⱡ Tᵾpa Rᵾpᵾndrᵾm

24 Akup na ndi, enim nga nᵾmp mindil tᵾnt uⱡ ei, numan enim. Nambuⱡ emel, na nga kᵾng ei, wak rop, Kraist nga mindil nurum kᵾng nit ei, tᵾp rapᵾndᵾp etᵾp, ora nduimp nᵾmp it. Ei elim nga manga wingti ila wamp kᵾⱡ nga, na nga kᵾng orunga, mindil timp uⱡ ei ndi, Kraist nga mindil nurum kᵾng ei kᵾn mba, kapⱡa etangga! 25 Got elim ndi, enim molk kai mundeing nimba, na wi ropa tᵾpa kindmant kongun ei tᵾpa ngurum. Kongun ei, Got elim nga nombuⱡa rung ik ei neimp nimba itim. 26 Ik ei, unt kor nga ui mbila, wamp nga kuimp keta ila mo ropa titim. Akup wamp kᵾⱡ nga kuimp keta ila etpa mot ndunum. 27 Got nga numan ila pᵾtᵾm uⱡ ei, elim nga uⱡ mo ropa titim mbᵾ, elim nga wamp mbᵾ kᵾn, tᵾpa mot ndurum. Uⱡ eng nui kai tetᵾm mbᵾ, wamp mbᵾ nga pora tendᵾtᵾm. Ik mo ropa ei, Kraist ei nim kᵾn rukᵾr morum ei ndi, nim etpa tᵾpa muⱡ kona mepa mba. 28 Ei nga, Kraist nga Rᵾnang Ik Kai ei, wamp mbᵾ kᵾn pora nᵾmp ngurmᵾn. Pilpa kungᵾndi numan ronduⱡ mbila, moⱡpᵾn wamp mbᵾ, man ngumbun mbo endpᵾn itamina, wamp tenda nimba, Kraist kᵾn ok tᵾk tenda etᵾk, ronduⱡ puk muⱡeing. 29 Uⱡ i itimp pilip kᵾn, na nga ronduⱡ ei, kᵾmp kᵾm ruk ndup, kongun ronduⱡ mundᵾp et ei, Kraist na kᵾn moⱡpa, kongun elinga et.